Elegiae

Tibullus

Tibullus. Aliorumque carminum libri tres. Postgate, J. P. (John Percival), editor. Oxford: Scriptorum classicorum bibliotheca Oxoniensis, 1915.

  1. Nulla tuum nobis subducet femina lectum:
  2. hoc primum iuncta est foedere nostra uenus.
  3. Tu mihi sola places, nec iam te praeter in urbe
  4. formosa est oculis ulla puella meis.
  5. Atque utinam posses uni mihi bella uideri!
  6. Displiceas aliis: sic ego tutus ero.
  7. Nil opus inuidia est, procul absit gloria uulgi:
  8. qui sapit, in tacito gaudeat ille sinu.
  9. Sic ego secretis possum bene uiuere siluis,
  10. qua nulla humano sit uia trita pede.
  11. Tu mihi curarum requies, tu nocte uel atra
  12. lumen, et in solis tu mihi turba locis.
  13. Nunc licet e caelo mittatur amica Tibullo,
  14. mittetur frustra deficietque Venus;
  15. hoc tibi sancta tuae Iunonis numina iuro,
  16. quae sola ante alios est mihi magna deos.
  17. Quid facio demens? Heu! heu! mea pignora cedo;
  18. iuraui stulte: proderat iste timor.
  19. Nunc tu fortis eris, nunc tu me audacius ures:
  20. hoc peperit misero garrula lingua malum.