Christus Patiens [Dub.] (Fort. Auctore Constantino Manasse)
Gregory, of Nazianzus
Gregorius Nazianzenus, Christus Patiens, Brambs, Teubner, 1885
- καὶ χάρμα δείξει λαμπρὸν ἤματι τρίτῳ.
- οἶδάς τε σὺ μάλιστα τέρμα δρωμένων·
- θήσει δὲ λύπης ἀντὶ τῆσδε καὶ γόων
- τιμὰς μεγίστας ἀνὰ γῆν σοι καὶ πόλον,
- πλήσει τε πᾶσαν γαῖαν εὐδόξων λόγων,
- ναούς τε σοι τεύξουσι τὸ βροτῶν φῦλον.
- Θᾶττον γὰρ ἀντὶ τοῦδε δυσσεβοῖς φόνου
- σεμνὴν ἑορτὴν τῇδε γῇ προσάψεται
- καὶ γῆν Σολύμων ἱερὸν τεύξει πέδον·
- ὧν εἵνεκα χρὴ μὴ μέτρου θρηνεῖν πέρα.
- Μὴ δῆτα γοῦν, δέσποιν’, ἀφέρτατα στένε,
- οὔτ’ ὄμμ’ ἐπαίρουσ’ οὔτ᾿ ἀπαλλάσσουσα γῆς
- πρόσωπον, οὐ βλέφαρα δακρύων ῥοῆς.
- Ἕως πότε στρέψεις δὲ κάτω τὴν δέρην,
- ῥοαῖς καταρδεύουσα τὴν γῆν δακρύων,
- ἔκδικον ὄμμα παντεπόπτου Δεσπότου
- εἰδυῖα θᾶττον χάρμα σοι φέρειν μέγα,
- πρὸς ὅν σε τείνειν ὄμμα καὶ μόνον δέον;
- Οἶδας γὰρ, οἶδας· ἕψεται τοῖς φροιμίοις
- καὶ τέρμα φαιδρὸν, γηθόσυνος ἡμέρα·