Iliad
Homer
Homer. Homeri Opera, Volumes 1-2. Monro, D. B. (David Binning), editor; Allen, Thomas W. (Thomas William), editor. Oxford: Clarendon Press, 1908-1920.
- νῦν δὴ καὶ σίτου πασάμην καὶ αἴθοπα οἶνον
- λαυκανίης καθέηκα· πάρος γε μὲν οὔ τι πεπάσμην.
- ἦ ῥʼ, Ἀχιλεὺς δʼ ἑτάροισιν ἰδὲ δμῳῇσι κέλευσε
- δέμνιʼ ὑπʼ αἰθούσῃ θέμεναι καὶ ῥήγεα καλὰ
- πορφύρεʼ ἐμβαλέειν, στορέσαι τʼ ἐφύπερθε τάπητας,
- χλαίνας τʼ ἐνθέμεναι οὔλας καθύπερθεν ἕσασθαι.
- αἳ δʼ ἴσαν ἐκ μεγάροιο δάος μετὰ χερσὶν ἔχουσαι,
- αἶψα δʼ ἄρα στόρεσαν δοιὼ λέχεʼ ἐγκονέουσαι.
- τὸν δʼ ἐπικερτομέων προσέφη πόδας ὠκὺς Ἀχιλλεύς·
- ἐκτὸς μὲν δὴ λέξο γέρον φίλε, μή τις Ἀχαιῶν
- ἐνθάδʼ ἐπέλθῃσιν βουληφόρος, οἵ τέ μοι αἰεὶ
- βουλὰς βουλεύουσι παρήμενοι, ἣ θέμις ἐστί·
- τῶν εἴ τίς σε ἴδοιτο θοὴν διὰ νύκτα μέλαιναν,
- αὐτίκʼ ἂν ἐξείποι Ἀγαμέμνονι ποιμένι λαῶν,
- καί κεν ἀνάβλησις λύσιος νεκροῖο γένηται.
- ἀλλʼ ἄγε μοι τόδε εἰπὲ καὶ ἀτρεκέως κατάλεξον,
- ποσσῆμαρ μέμονας κτερεϊζέμεν Ἕκτορα δῖον,
- ὄφρα τέως αὐτός τε μένω καὶ λαὸν ἐρύκω.
- τὸν δʼ ἠμείβετʼ ἔπειτα γέρων Πρίαμος θεοειδής·
- εἰ μὲν δή μʼ ἐθέλεις τελέσαι τάφον Ἕκτορι δίῳ,