Iliad
Homer
Homer. Homeri Opera, Volumes 1-2. Monro, D. B. (David Binning), editor; Allen, Thomas W. (Thomas William), editor. Oxford: Clarendon Press, 1908-1920.
- Ἀντίλοχʼ εἰ δʼ ἄγε δεῦρο διοτρεφές, ἣ θέμις ἐστί,
- στὰς ἵππων προπάροιθε καὶ ἅρματος, αὐτὰρ ἱμάσθλην
- χερσὶν ἔχε ῥαδινήν, ᾗ περ τὸ πρόσθεν ἔλαυνες,
- ἵππων ἁψάμενος γαιήοχον ἐννοσίγαιον
- ὄμνυθι μὴ μὲν ἑκὼν τὸ ἐμὸν δόλῳ ἅρμα πεδῆσαι.
- τὸν δʼ αὖτʼ Ἀντίλοχος πεπνυμένος ἀντίον ηὔδα·
- ἄνσχεο νῦν· πολλὸν γὰρ ἔγωγε νεώτερός εἰμι
- σεῖο ἄναξ Μενέλαε, σὺ δὲ πρότερος καὶ ἀρείων.
- οἶσθʼ οἷαι νέου ἀνδρὸς ὑπερβασίαι τελέθουσι·
- κραιπνότερος μὲν γάρ τε νόος, λεπτὴ δέ τε μῆτις.
- τώ τοι ἐπιτλήτω κραδίη· ἵππον δέ τοι αὐτὸς
- δώσω, τὴν ἀρόμην. εἰ καί νύ κεν οἴκοθεν ἄλλο
- μεῖζον ἐπαιτήσειας, ἄφαρ κέ τοι αὐτίκα δοῦναι
- βουλοίμην ἢ σοί γε διοτρεφὲς ἤματα πάντα
- ἐκ θυμοῦ πεσέειν καὶ δαίμοσιν εἶναι ἀλιτρός.
- ἦ ῥα καὶ ἵππον ἄγων μεγαθύμου Νέστορος υἱὸς
- ἐν χείρεσσι τίθει Μενελάου· τοῖο δὲ θυμὸς
- ἰάνθη ὡς εἴ τε περὶ σταχύεσσιν ἐέρση
- ληΐου ἀλδήσκοντος, ὅτε φρίσσουσιν ἄρουραι·
- ὣς ἄρα σοὶ Μενέλαε μετὰ φρεσὶ θυμὸς ἰάνθη.