Iliad
Homer
Homer. Homeri Opera, Volumes 1-2. Monro, D. B. (David Binning), editor; Allen, Thomas W. (Thomas William), editor. Oxford: Clarendon Press, 1908-1920.
- δώδεκα μὲν Τρώων μεγαθύμων υἱέας ἐσθλοὺς
- τοὺς ἅμα σοὶ πάντας πῦρ ἐσθίει· Ἕκτορα δʼ οὔ τι
- δώσω Πριαμίδην πυρὶ δαπτέμεν, ἀλλὰ κύνεσσιν.
- ὣς φάτʼ ἀπειλήσας· τὸν δʼ οὐ κύνες ἀμφεπένοντο,
- ἀλλὰ κύνας μὲν ἄλαλκε Διὸς θυγάτηρ Ἀφροδίτη
- ἤματα καὶ νύκτας, ῥοδόεντι δὲ χρῖεν ἐλαίῳ
- ἀμβροσίῳ, ἵνα μή μιν ἀποδρύφοι ἑλκυστάζων.
- τῷ δʼ ἐπὶ κυάνεον νέφος ἤγαγε Φοῖβος Ἀπόλλων
- οὐρανόθεν πεδίον δέ, κάλυψε δὲ χῶρον ἅπαντα
- ὅσσον ἐπεῖχε νέκυς, μὴ πρὶν μένος ἠελίοιο
- σκήλειʼ ἀμφὶ περὶ χρόα ἴνεσιν ἠδὲ μέλεσσιν.
- οὐδὲ πυρὴ Πατρόκλου ἐκαίετο τεθνηῶτος·
- ἔνθʼ αὖτʼ ἀλλʼ ἐνόησε ποδάρκης δῖος Ἀχιλλεύς·
- στὰς ἀπάνευθε πυρῆς δοιοῖς ἠρᾶτʼ ἀνέμοισι
- Βορέῃ καὶ Ζεφύρῳ, καὶ ὑπίσχετο ἱερὰ καλά·
- πολλὰ δὲ καὶ σπένδων χρυσέῳ δέπαϊ λιτάνευεν
- ἐλθέμεν, ὄφρα τάχιστα πυρὶ φλεγεθοίατο νεκροί,
- ὕλη τε σεύαιτο καήμεναι. ὦκα δὲ Ἶρις
- ἀράων ἀΐουσα μετάγγελος ἦλθʼ ἀνέμοισιν.
- οἳ μὲν ἄρα Ζεφύροιο δυσαέος ἀθρόοι ἔνδον