Iliad
Homer
Homer. Homeri Opera, Volumes 1-2. Monro, D. B. (David Binning), editor; Allen, Thomas W. (Thomas William), editor. Oxford: Clarendon Press, 1908-1920.
- Νέστορά τʼ ἀμφὶ μέγαν καὶ ἀρήϊον Ἰδομενῆα.
- Ἕκτωρ μὲν μετὰ τοῖσιν ὁμίλει μέρμερα ῥέζων
- ἔγχεΐ θʼ ἱπποσύνῃ τε, νέων δʼ ἀλάπαζε φάλαγγας·
- οὐδʼ ἄν πω χάζοντο κελεύθου δῖοι Ἀχαιοὶ
- εἰ μὴ Ἀλέξανδρος Ἑλένης πόσις ἠϋκόμοιο
- παῦσεν ἀριστεύοντα Μαχάονα ποιμένα λαῶν,
- ἰῷ τριγλώχινι βαλὼν κατὰ δεξιὸν ὦμον.
- τῷ ῥα περίδεισαν μένεα πνείοντες Ἀχαιοὶ
- μή πώς μιν πολέμοιο μετακλινθέντος ἕλοιεν.
- αὐτίκα δʼ Ἰδομενεὺς προσεφώνεε Νέστορα δῖον·
- ὦ Νέστορ Νηληϊάδη μέγα κῦδος Ἀχαιῶν
- ἄγρει σῶν ὀχέων ἐπιβήσεο, πὰρ δὲ Μαχάων
- βαινέτω, ἐς νῆας δὲ τάχιστʼ ἔχε μώνυχας ἵππους·
- ἰητρὸς γὰρ ἀνὴρ πολλῶν ἀντάξιος ἄλλων
- ἰούς τʼ ἐκτάμνειν ἐπί τʼ ἤπια φάρμακα πάσσειν.
- ὣς ἔφατʼ, οὐδʼ ἀπίθησε Γερήνιος ἱππότα Νέστωρ.
- αὐτίκα δʼ ὧν ὀχέων ἐπεβήσετο, πὰρ δὲ Μαχάων
- βαῖνʼ Ἀσκληπιοῦ υἱὸς ἀμύμονος ἰητῆρος·
- μάστιξεν δʼ ἵππους, τὼ δʼ οὐκ ἀέκοντε πετέσθην
- νῆας ἔπι γλαφυράς· τῇ γὰρ φίλον ἔπλετο θυμῷ.