Nam ut est genus aut Graecorum aut Aniciorum et
aliorum, ita ex parentibus suis omnis illorum emerserit
progenies, ex uno nomine impia generatio ut Bahalitae dicerentur.
Itaque mortui, cum in monumentis ponerentur, et
progenies illorum itidem sepulta in eo loco hoc nomine a
suo populo meruit a posteris nuncupari,
a sua generatione pristina.
Belus autem siue a proprio
nomine, siue a fortitudine belli, quia multos superabat tunc
temporis, hoc nomen aut cognomen habere sortitus est: deque
hac re Iudaeorum populus impietatem gentilium sequendo a
diuina scriptura accusatur, quod sacrificantes illis, id est
regibus et eorum filiis omnique cognationi illorum sequenti
diuersis captiuitatibus tradebantur.