denique spiritaliter de populis hoc
esse mysterium senior declarauit. nam cum filius eum putaret
errasse uitio hebetioris aspectus, conuertere uoluit manus
eius dicens: non sic pater; hic enim primitiuus est.
inpone dexteram tuam supra caput eius. et noluit,
sed dixit: scio, fili, scio. et hic erit in populum,
et hic exaltabitur, sed frater eius iunior maior
illo erit, et semen illius erit multitudo gentium.
denique praeferendum Ephraem seniori germano etiam benedictionis
serie prophetauit dicens: in uobis benedicetur
Istrahel dicentibus: faciat uobis deus sicut
Ephraem et Manasse. et ideo cum essent nepotes, in
locum filiorum sunt adoptati, ut non essent auitae benedictionis
expertes.
qui ante iuniorem seniori praetulerat coepit a primo, ut in
illo mysterii praeferret gratiam, in hoc ordinem seruaret aetatis,
simul quia ante in duobus benedixerat uniuersos cum omni
posteritate et progenie futurorum, ne aut superflua uideretur
plebis iterata benedictio aut prior aestimaretur infirma. meritoque
repetitam magis adnuntiationem eorum quae posterioribus
essent euentura temporibus quam benedictionem conferre se
dicit.