Vincuntur causa Parthi: vincantur et armis;Eoas Latio dux meus addat opes.Marsque pater Caesarque pater, date numen eunti:Nam deus e vobis alter es, alter eris.Auguror, en, vinces; votivaque carmina reddam,Et magno nobis ore sonandus eris.Consistes, aciemque meis hortabere verbis;O desint animis ne mea verba tuis!Tergaque Parthorum Romanaque pectora dicam,Telaque, ab averso quae iacit hostis equo.Qui fugis ut vincas, quid victo, Parthe, relinquis?Parthe, malum iam nunc Mars tuus omen habet.Ergo erit illa dies, qua tu, pulcherrime rerum,Quattuor in niveis aureus ibis equis. Ibunt ante duces onerati colla catenis,Ne possint tuti, qua prius, esse fuga.Spectabunt laeti iuvenes mixtaeque puellae,Diffundetque animos omnibus ista dies.Atque aliqua ex illis cum regum nomina quaeret,Quae loca, qui montes, quaeve ferantur aquae,