GetPassage urn:cts:latinLit:phi0860.phi001.perseus-lat2:8.1.43-8.1.45 urn:cts:latinLit:phi0860.phi001.perseus-lat2:8.1.43-8.1.45

Iam tantum irae conceperat rex, quantum vix sobrius ferre potuisset. Enimvero olim mero sensibus victis ex lecto repente prosiluit.

Attoniti amici ne positis quidem, sed abiectis poculis consurgunt in eventum rei, quam tanto impetu acturus esset, intenti.

Alexander rapta lancea ex manibus armigeri Clitum adhuc eadem linguae intemperantia furentem percutere conatus a Ptolomaeo et Perdicca inhibetur.