δεῦρό σε τειρομένοισι σαόπτολιν ἀνδράσι θήσω,μή ποτέ σοι βαρύμηνις ἐπιβρίσειεν Ἐνυώ.πείθεο, καὶ πολέμους τε καὶ ἠνορέην σε διδάξω. ὣς ἡ μὲν πολύμητις ἀνηΰτησεν Ἀθήνη.τοῖα δʼ ὑποβλήδην λευκώλενος ἔννεπεν Ἥρη·εἴ με διακρίνων προφερέστερον ἔρνος ὀπάσσῃς,πάσης ἡμετέρης Ἀσίης ἡγήτορα θήσω.ἔργα μόθων ἀθέριζε· τί γὰρ πολέμων βασιλῆι; κοίρανος ἰφθίμοισι καὶ ἀπτολέμοισι κελεύει.οὐκ αἰεὶ θεράποντες ἀριστεύουσιν Ἀθήνης·ὠκύμοροι θνῄσκουσιν ὑποδρηστῆρες Ἐνυοῦς.τοίην κοιρανίην πρωτόθρονος ὤπασεν Ἥρη.ἡ δʼ ἑανὸν βαθύκολπον, ἐς ἠέρα γυμνώσασα κόλπον, ἀνῃώρησε καὶ οὐκ ᾐδέσσατο Κύπρις.