GetPassage urn:cts:latinLit:stoa0252.stoa002.opp-lat1:2.1-2.12 urn:cts:latinLit:stoa0252.stoa002.opp-lat1:2.1-2.12

Expulerat primogenitum saeuissimus anguis Florigera de sede uirum blandique saporis Inlecebris letum misero portarat amarum. Nec solus meritam praesumptor senserat iram Mortali sub lege iacens, sed prorsus ab ipso Humanum simul omne genus. heu, noxia coniux! Noxia tu coniux magis an draco perfidus ille? Perfidus ille draco, sed tu quoque noxia coniux. Pro dolor! aeterni fuerant duo. crescere posquam Coepit origo, perit clademque a semine sumpsit. Quid numerosa dies, quid tempore proderat illo Cernere nongentos ultra feliciter annos