Alethia

Victor, Claudius Marius

Victor, Claudius Marius. Saint. Poetae Christiani Minores, Pars I (Corpus scriptorum ecclesiasticorum latinorum, Volume 16, Part 1). Petschenig, Michael, editor; Ellis, Robinson, editor; Brandes, Wilhelm, editor; Schenkl, Karl, editor. Vienna, Leipzig, Prague: Tempsky, Freytag, 1888.

  1. missilibus cautesque rotant, quarum una reducto
  2. altius ad nisum facilem dare certa lacerto
  3. obsequitur uotis oculosque animamque secuta
  4. et nudum in silicem media serpente resultat
  5. scintillamque ciet, sicco quae fomite pasta
  6. ac mox flamma fuit crinita incendia late
  7. extendens siccoque floret iam candida fumo.
  8. horruerant latebrasque gradu trepidante petebant,
  9. sed pauidos stupor ipse tenet curamque sagacem
  10. humani pandit uitii, quod cernere rursum
  11. et timidi metuenda uolunt paulumque remoti
  12. telluris dorso sterilis mirantur opacas
  13. procubuisse comas nemorum, sordere fauillis
  14. fuscarique diem, totas splendescere terras
  15. et lucem sub sole nouam. nec mente quieta
  16. accipiunt crepitus stridentibus undique siluis
  17. undantesque globos flammarum in sidera ferri,
  18. dum se radices demersus tendit ad imas
  19. ignis edax penitus, sumpto quo uicta calore
  20. terra rudis pandit generosa ad munera uenas