Alethia

Victor, Claudius Marius

Victor, Claudius Marius. Saint. Poetae Christiani Minores, Pars I (Corpus scriptorum ecclesiasticorum latinorum, Volume 16, Part 1). Petschenig, Michael, editor; Ellis, Robinson, editor; Brandes, Wilhelm, editor; Schenkl, Karl, editor. Vienna, Leipzig, Prague: Tempsky, Freytag, 1888.

  1. hinc est, ignarus partem quod senserit Adam
  2. se recepisse sui: tetigit noua gratia mentem
  3. affectusque oculis in uiscera nota receptus
  4. irruit et tanto penetrauit in ossa calore,
  5. ut iam scire daret, quod nomen coniugis uxor,
  6. quod dulces nati postponendique parentes [*]( Gen. 2, 24 )
  7. coniugibus. quid? iam una duos in carne manere
  8. aeternam pariter uitam ducentibus esset —
  9. nam dum terrarum uitiis et labe carerent,
  10. diuinis uiguere animis, nullius egeni
  11. quas dabat orbis opes: non quippe obnoxia morbis
  12. corpora gestabant cupidi nec uentris alumna;
  13. tantum in deliciis cibus et quod postulat usus
  14. nondum erat auxilium uitae propriumque uigebat
  15. inmortale animae —, ni serpens dira ueneno [*]( Gen. 3, 1— )
  16. maioris stimulata mali dissoluere legem
  17. talibus incautam suasisset fraudibus Euam:
  18. \'o uitae melioris inops rerumque bonarum
  19. gens ignara homines! nam qui dinoscere nescit
  20. quo distent diuersa bonis, hic nec bona nouit.