Alethia

Victor, Claudius Marius

Victor, Claudius Marius. Saint. Poetae Christiani Minores, Pars I (Corpus scriptorum ecclesiasticorum latinorum, Volume 16, Part 1). Petschenig, Michael, editor; Ellis, Robinson, editor; Brandes, Wilhelm, editor; Schenkl, Karl, editor. Vienna, Leipzig, Prague: Tempsky, Freytag, 1888.

  1. ut repetita sacrum geminet narratio munus,
  2. utile praeseritur populos quandoque renasci.
  3. quorum fonte dato iam tunc et origine summa,
  4. Eoos aperit felix qua terra recessus,
  5. editiore globo nemoris paradisus amoeni [*]( Gen. S, 8 )
  6. pangitur et teretis distinguitur ordine siluae.
  7. hic, ubi iam spatiis limes discernitur aequis
  8. solis et aeternum paribus uer temperat horis,
  9. illic quaeque suis diues stat fructibus arbor [*]( Gen. 2, 9 )
  10. pomaque succiduis pelluntur mitia pomis,
  11. quae sunt blanda oculis et miri plena uigoris
  12. membra animosque fouent pascuntque sapore et odore.
  13. tellus sidereos uibrat distincta colores
  14. semper flore nouo, quaeque arida tegmine sicco
  15. iam fragiles soluunt calamos, animata uigore
  16. muneris ambrosii spirantia cinnama fundunt,
  17. sed nec quod Medus redolet uel crine soluto
  18. fragrat Achaemenius, quod molli diues amomo
  19. Assyrius messisque rubens Mareotica nardo,
  20. quod Tartesiaci frutices, quod uirga Sabaei,