Alethia

Victor, Claudius Marius

Victor, Claudius Marius. Saint. Poetae Christiani Minores, Pars I (Corpus scriptorum ecclesiasticorum latinorum, Volume 16, Part 1). Petschenig, Michael, editor; Ellis, Robinson, editor; Brandes, Wilhelm, editor; Schenkl, Karl, editor. Vienna, Leipzig, Prague: Tempsky, Freytag, 1888.

  1. Ante polos caelique diem mundique tenebras,
  2. ante operum formas uel res uel semina rerum,
  3. aeternum sine fine retro) sine fine futuri
  4. esse subest cui semper, erat deus unus, apud quem
  5. uiuebat genitus uerbum deus et simul almus
  6. spiritus, arcani uitalis summa uigoris.
  7. una trium quo se uegetans substantia nexu
  8. ingenita (sese) semper uirtute beabat
  9. regnabatque potens, in maiestate creandi
  10. iam res et causas rerum casusque futuros
  11. et facienda uidens gignendaque mente capaci
  12. saecula dispiciens et quicquid tempora uoluunt
  13. praesens semper habens. inmensum mole beata
  14. regnum erat ipse suum, regni nec teste carebat,
  15. uirtus trina deus, qui primum semine nullo
  16. corpora dans rebus, dum res existere cogit,
  17. ut nostrum faceret munus, quod solus habebat,
  18. solus norat opus, ditem absoluentia mundum
  19. cuncta simul genuit, sed partibus edita certo
  20. limite distinguens speciali protulit ortu,