Dittochaeon

Prudentius

Prudentius, Volume 2. Thomson, H. J, editor. London; Cambridge, Mass.: William Heinemann Ltd., Harvard University Press, 1953 (printing).

  1. Fumat montis apex divinis ignibus, in quo
  2. scripta decem verbis saxorum pagina Moysi
  3. traditur; ille suos suscepta lege revisit,
  4. forma sed his vituli solus deus et deus aurum.
    5. p.352
  1. Panibus angelicis albent tentoria patrum,
  2. certa fides facti: tenet urceus aureus exim
  3. servatum manna; ingratis venit altera nubes
  4. atque avidos carnis saturat congesta coturnix.
  1. Fervebat via sicca heremi serpentibus atris,
  2. iamque venenati per vulnera livida morsus
  3. carpebant populum, sed prudens aere politum
  4. dux cruce suspendit, qui virus temperet, anguem.
  1. Aspera gustatu populo sitiente lacuna
  2. tristificos latices stagnanti felle tenebat.
  3. Moyses sanctus ait: ‘lignum date, gurgitem in istum
  4. conicite, in dulcem vertentur amara saporem.’