Cathemerina

Prudentius

Prudentius, Volume 1. Thomson, H. J, editor. London; Cambridge, Mass.: William Heinemann Ltd., Harvard University Press, 1949 (printing).

  1. Quicumque Christum quaeritis,
  2. oculos in altum tollite:
  3. illic licebit visere
  4. signum perennis gloriae.
  5. haec stella, quae solis rotam
  6. vincit decore ac lumine,
  7. venisse terris nuntiat
  8. cum carne terrestri Deum.
  9. non illa servit noctibus
  10. secuta lunam menstruam,
  11. sed sola caelum possidens
  12. cursum dierum temperat.
  13. Arctoa quamvis sidera
  14. in se retortis motibus
  15. obire nolint, attamen
  16. plerumque sub nimbis latent.
  17. hoc sidus aeternum manet,
  18. haec stella nunquam mergitur,
  19. nec nubis occursu abdita
  20. obumbrat obductam facem.