Cathemerina

Prudentius

Prudentius, Volume 1. Thomson, H. J, editor. London; Cambridge, Mass.: William Heinemann Ltd., Harvard University Press, 1949 (printing).

  1. qui iacta cadavera passim
  2. miserans tegit aggere terrae,
  3. opus exhibet ille benignum
  4. Christo pius omnipotenti,
  5. quia lex eadem monet omnes
  6. gemitum dare sorte sub una,
  7. cognataque funera nobis
  8. aliena in morte dolere.
  9. sancti sator ille Tobiae,
  10. sacer ac venerabilis heros,
  11. dapibus iam rite paratis
  12. ius praetulit exequiarum.
  13. iam stantibus ille ministris
  14. cyathos et fercula liquit,
  15. studioque accinctus humandi
  16. fleto dedit ossa sepulcro.
  17. veniunt mox praemia caelo,
  18. pretiumque rependitur ingens;
  19. nam lumina nescia solis
  20. deus inlita felle serenat.