Psychomachia
Prudentius
Prudentius, Volume 1. Thomson, H. J, editor. London; Cambridge, Mass.: William Heinemann Ltd., Harvard University Press, 1949 (printing).
- orbis Avaritia, sternens centena virorum
- millia vulneribus variis: hunc lumine adempto
- effossisque oculis velut in caligine noctis
- caecum errare sinit perque offensacula multa
- ire, nec oppositum baculo temptare periclum.
- porro alium capit intuitu fallitque videntem,
- insigne ostentans aliquid, quod dum petit ille,
- excipitur telo incautus cordisque sub ipso
- saucius occulto ferrum suspirat adactum.
- multos praecipitata in aperta incendia cogit
- nec patitur vitare focos, quibus aestuat aurum,
- quod petit arsurus pariter speculator 1 avarus.
- omne hominum rapit illa genus, mortalia cuncta
- occupat interitu, neque est violentius ullum
- terrarum vitium, quod tantis cladibus aevum
- mundani involvat populi damnetque gehennae.
- quin ipsos temptare manu, si credere dignum est,
- ausa sacerdotes Domini, qui proelia forte
- ductores primam ante aciem pro laude gerebant
- virtutum, magnoque inplebant classica flatu.