Psychomachia
Prudentius
Prudentius, Volume 1. Thomson, H. J, editor. London; Cambridge, Mass.: William Heinemann Ltd., Harvard University Press, 1949 (printing).
- serta venustatis collique ac verticis aurum
- solvitur, et gemmas Discordia dissona turbat,
- non piget adtritis pedibus per acuta frutecta
- ire voluptatem, quoniam vis maior acerbam
- conpellit tolerare fugam; formido pericli
- praedurat teneras iter ad cruciabile plantas,
- qua se cumque fugax trepidis fert cursibus agmen,
- damna iacent, crinalis acus, redimicula, vittae,
- fibula, flammeolum, strophium, diadema, monile.
- his se Sobrietas et totus Sobrietatis
- abstinet exuviis miles damnataque castis
- scandala proculcat pedibus, nec fronte severos
- conivente oculos praedarum ad gaudia flectit.
- fertur Avaritia gremio praecincta capaci,
- quidquid Luxus edax pretiosum liquerat, unca
- corripuisse manu, pulchra in ludibria vasto
- ore inhians aurique legens fragmenta caduci
- inter harenarum cumulos. nec sufficit amplos
- inplevisse sinus; iuvat infercire cruminis
- turpe lucrum et gravidos furtis distendere fiscos,
p.310