Liber Peristephanon
Prudentius
Prudentius, Volume 2. Thomson, H. J, editor. London; Cambridge, Mass.: William Heinemann Ltd., Harvard University Press, 1953 (printing).
- est intus imo ergastulo
- locus tenebris nigrior,
- quem saxa mersi fornicis
- angusta clausum strangulant.
- aeterna nox illic latet
- expers diurni sideris;
- hic carcer horrendus suos
- habere fertur inferos.
- in hoc barathrum conicit
- truculentus hostis martyrem,
- lignoque plantas inserit
- divaricatis cruribus.
- quin addit et poenam novam
- crucis peritus artifex,
- nulli tyranno cognitam
- nec fando conpertam retro.
- fragmenta testarum iubet
- hirta, inpolitis angulis,
- acuminata, informia,
- tergo iacentis sternerent.
p.184