Carmina

Ennodius, Magnus Felix

Magnus Felix Ennodius. Magni Felicis Ennodii Opera Omnia (Corpus Scriptorum Ecclesiasticorum Latinorum, Volume 6). Hartel, Wilhelm, editor. Vienna: Gerold, 1882.

  1. Astrorum populus necdum de lumine solis
  2. Perdiderat lucem, gremio sed noctis adultae
  3. Fundebat rutilos madefacto aspargine crines:
  4. Cynthia per croceas fulgebat lactea bigas,
  5. Rescindens quicquid descripserat orbita fratris:
  6. Vernabat tacitus splendor de munere noctis,
  7. Torrida frigoribus confringens tempora Cancri:
  8. Cum me curarum cupientem spernere fasces,
  9. Ruris amoenati facies depicta uocauit.
  10. Cornipedem scandi, qualem uix Cyllarus aequat,
  11. Mollibus aetherias qui uincit cursibus auras,
  12. Inmobilis currit cuius per deuia sessor,
  13. In statione uolans pedibus constanter adactis.