de consulatu Stilichonis

Claudian

Claudian, Volume 1-2. Platnauer, Maurice, editor. Harvard University Press: Cambridge, MA; London, England, 1922.

  1. fascibus ad socii properant et vindicis annum,
  2. sic ubi fecunda reparavit morte iuventam
  3. et patrios idem cineres collectaque portat
  4. unguibus ossa piis Nilique ad litora tendens
  5. unicus extreme Phoenix procedit ab Euro :
  6. conveniunt aquilae cunctaeque ex orbe volucres,
  7. ut Solis mirentur avem ; procul ignea lucet
  8. ales, odorati redolent cui cinnama busti.
  9. Nee minor in caelo chorus est ; exultat uterque
  10. Theodosius divique tui ; Sol ipse quadrigis
  11. vere coronatis dignum tibi praeparat annum.
  12. Est ignota procul nostraeque impervia menti,
  13. vix adeunda deis, annorum squalida mater,
  14. inmensi spelunca aevi, quae tempora vasto
  15. suppeditat revocatque sinu. complectitur antrum,
  16. omnia qui placido consumit numine, serpens