Carminum minorum corpusculum

Claudian

Claudian, Volume 2. Platnauer, Maurice, editor. Harvard University Press: Cambridge, MA; London, England, 1922.

  1. contenti meliore manu seseque pavere
  2. confessi (finem studiis fecere procellae) :
  3. haud aliter Stilicho, fremuit cum Thracia belli
  4. tempestas, cunctis pariter cedentibus unus
  5. eligitur ductor ; suffragia quippe peregit
  6. iudex vera timor ; victus ratione salutis
  7. ambitus et pulsus iacuit formidine livor.
  8. Quis tibi tunc per membra tremor quantaeque cadebant
  9. ubertim lacrimae, cum saeva vocantibus arma
  10. iam lituis madido respectans lumina vultu
  11. optares reducem galeaeque inserta minaci
  12. oscula cristati raperes festina mariti !
  13. gaudia quae rursus, cum post victricia tandem
  14. classica sidereas ferratum pectus in ulnas
  15. exciperes, castae tuto per dulcia noctis
  16. otia pugnarum seriem narrare iuberes !