Epistulae imperatorum pontificum aliorum

DOMINO BEATISSIMO ET APOSTOLICO PATRI PAPAE HORMISDAE CELER. Maxima nobis gratulationis causa praestatur, quotiens ad apostolatum uestrum scribendi tempus emerserit.

nunc igitur remeante beatissimo Germano episcopo uel reuerentissimis uiris, qui a uobis pro coniungendis sanctis ecclesiis fuerunt destinati. necessarium duximus sanctitatem uestram debite uenerari, indicantes ante dictos habuisse quidem studium, ut uoluntatem uestram plenus sequeretur effectus; sed quia totum corpus erat infirmum, interim caput, quod prius necessarium iudicatur, adhibito medicamine uestro sanatum est et dissensio, quae erat inter uenerabiles ecclesias Romanam et Constantinopolitanam, unitate interueniente sepulta est et alia non parua membra simili sunt diuinitatis gratia purgata atque coniuncta.

hanc etiam spem gerimus uniuersi, quod gratia dei, quae semper sedi uestrae permansit et permanet, huiusmodi uobis inspirationem bonitatis praebeat, ut mansuetudine et dispensatione uestra reliquum adhuc corpus, quod habetur infirmum, sicut superius a nobis dictum est, uestro medicamine unitate recepta iungatur.

specialiter autem deprecamur pontificium uestrum, ut pro nobis benigno patris animo orare iubeatis.