Epistulae

Ausonius, Decimus Magnus

Ausonius, Decimus Magnus. Ausonius, Volume 2. Evelyn-White, Hugh G. (Hugh Gerard), editor. London, Cambridge, MA: William Heinemann, Ltd.; Harvard University Press, 1921.

  1. PROXIMA quae nostrae fuerat querimonia chartae,
  2. credideram quod te, Pauline, inflectere posset
  3. eliceretque tuam blanda obiurgatio vocem.
  4. set tu, iuratis velut alta silentia sacris
  5. devotus teneas, perstas in lege tacendi.
  6. non licet? anne pudet, si quis tibi iure paterno
  7. vivat amicus adhuc maneasque obnoxius heres?
  8. ignavos agitet talis timor, at tibi nullus
  9. sit metus et morem missae acceptaeque salutis
  10. audacter retine, vel si tibi proditor instat
  11. aut quaesitoris gravior censura finietur,
  12. occurre ingenio, quo saepe occulta teguntur.
  13. Thraeicii quondam quam saeva licentia regis
  14. fecerat elinguem, per licia texta querellas
  15. edidit et tacitis mandavit crimina telis.
  16. et pudibunda suos malo commisit amores
  17. virgo nec erubuit tacituro conscia pomo.
  18. depressis scrobibus vitium regale minister
  19. credidit idque diu texit fidissima tellus:
  20. inspirata dehinc vento cantavit harundo.