Epigrammaton Liber

Ausonius, Decimus Magnus

Ausonius, Decimus Magnus. Ausonius, Volume 2. Evelyn-White, Hugh G. (Hugh Gerard), editor. London, Cambridge, MA: William Heinemann, Ltd.; Harvard University Press, 1921.

  1. EST quod mane legas, est et quod vespere; laetis
  2. seria miscuimus, tempore uti placeant,
  3. non unus vitae color est nec carminis unus
  4. lector; habet tempus pagina quaeque suum;
  5. hoc mitrata Venus, probat hoc galeata Minerva;
  6. Stoicus has partes, has Epicurus amat;
  7. salva mihi veterum maneat dum regula morum,
  8. plaudat permissis sobria musa iocis.