Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. morte sua minuat luctus. haec pompa sequetur
  2. exequias, seroque emptum uolet impia Roma
  3. non uiolasse mei corpus mucrone Sychaei.’
  4. Sic memorans torquet fumantem ex ore uaporem,
  5. iraque anhelatum proturbat pectore murmur,
  6. ut multo accensis feruore exuberat undis
  7. clausus ubi exusto liquor indignatur aeno.
  8. tum praeceps ruit in medios solumque fatigat
  9. Flaminium incessens. nec dicto segnius ille
  10. bella capessebat, propiorque insurgere Mauors
  11. coeperat, et campo iunctus iam stabat uterque,
  12. cum subitus per saxa fragor, motique repente,
  13. horrendum, colles et summa cacumina totis
  14. intremuere iugis. nutant in uertice siluae
  15. pinifero fractaeque ruunt super agmina rupes.
  16. immugit penitus conuulsis ima cauernis
  17. dissiliens tellus nec paruos rumpit hiatus,
  18. atque umbras late Stygias immensa uorago
  19. faucibus ostendit patulis, manesque profundi
  20. antiquum expauere diem. lacus ater in altos