Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. et propius suprema uident. sedet acta medullis
  2. iamdudum atque inopes penitus coquit intima pestis.
  3. est furtim lento misere durantia tabo
  4. uiscera et exurit siccatas sanguine uenas
  5. per longum celata fames. iam lumina retro
  6. exesis fugere genis, iam lurida sola
  7. tecta cute et uenis male iuncta trementibus ossa
  8. extant consumptis uisu deformia membris.
  9. umentis rores noctis terramque madentem
  10. solamen fecere mali, cassoque labore
  11. e sicco frustra presserunt robore sucos.
  12. nil temerare piget: rabidi ieiunia uentris
  13. insolitis adigunt uesci, resolutaque, nudos
  14. linquentes clipeos, armorum tegmina mandunt.
  15. Desuper haec caelo spectans Tirynthius alto
  16. inlacrimat fractae nequiquam casibus urbis.
  17. namque metus magnique tenent praecepta parentis
  18. ne saeuae tendat contra decreta nouercae.
  19. sic igitur coepta occultans ad limina sanctae
  20. contendit Fidei secretaque pectora temptat.