Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. inde agitant consulta patres curasque fatigant.
  2. Lentulus, ut cernens accensae tecta Sagunti,
  3. poscendum poenae iuuenem celerique negantis
  4. exuri bello Carthaginis arua iubebat.
  5. at Fabius, cauta speculator mente futuri
  6. nec laetus dubiis parcusque lacessere Martem
  7. et melior clauso bellum producere ferro,
  8. prima super tantis rebus pensanda, ducisne
  9. ceperit arma furor, patres an signa moueri
  10. censuerint, mittique uiros, qui exacta reportent.
  11. prouidus haec ritu uatis fundebat ab alto
  12. pectore praemeditans Fabius surgentia bella,
  13. ut saepe e celsa grandaeuus puppe magister,
  14. prospiciens signis uenturum in carbasa Corum,
  15. summo iam dudum substringit lintea malo.
  16. sed lacrimae atque ira mixtus dolor impulit omnis
  17. praecipitare latens fatum, lectique senatu,
  18. qui ductorem adeant; si perstet surdus in armis
  19. pactorum, uertant inde ad Carthaginis arces
  20. nec diuum oblitis indicere bella morentur.