Epigrammata

Martial

Martial. M. Valerii Martialis Epigrammata. Heraeus, Wilhelm, editor; Borovskij, Jacobus, editor. Stuttgart: Teubner, 1925. Reprinted with corrections in 1976.

  1. Me tibi Vindelicis Raetus narrabat in oris,
  2. Nescia nec nostri nominis Arctos erat:
  3. O quotiens veterem non infitiatus amicum
  4. Dixisti 'Meus est iste poeta, meus!'
  5. Omne tibi nostrum quod bis trieteride iuncta
  6. Ante dabat lector, nunc dabit auctor opus.
  1. Languidior noster si quando est Paulus, Atili,
  2. Non se, convivas abstinet ille suos.
  3. Tu languore quidem subito fictoque laboras,
  4. Sed mea porrexit sportula, Paule, pedes.