Epigrammata
Martial
Martial. M. Valerii Martialis Epigrammata. Heraeus, Wilhelm, editor; Borovskij, Jacobus, editor. Stuttgart: Teubner, 1925. Reprinted with corrections in 1976.
- Nil tibi legavit Fabius, Bithynice, cui tu
- Annua, si memini, milia sena dabas.
- Plus nulli dedit ille: queri, Bithynice, noli:
- Annua legavit milia sena tibi.
- Cenes, Canthare, cum foris libenter,
- Clamas et maledicis et minaris.
- Deponas animos truces, monemus:
- Liber non potes et gulosus esse.
- Nubere vis Prisco: non miror, Paula: sapisti.
- Ducere te non vult Priscus: et ille sapit.