Epigrammata
Martial
Martial. M. Valerii Martialis Epigrammata. Heraeus, Wilhelm, editor; Borovskij, Jacobus, editor. Stuttgart: Teubner, 1925. Reprinted with corrections in 1976.
- Sordida cum tibi sit, verum tamen, Attale, dicit,
- Quisquis te niveam dicit habere togam.
- Frontibus adversis molles concurrere dammas
- Vidimus et fati sorte iacere pari.
- Spectavere canes praedam, stupuitque superbus
- Venator, cultro nil superesse suo.
- Unde leves animi tanto caluere furore?
- Sic pugnant tauri, sic cecidere viri.
- Cana est barba tibi, nigra est coma: tinguere barbam
- Non potes—haec causa est—et potes, Ole, comam.