Epigrammata

Martial

Martial. M. Valerii Martialis Epigrammata. Heraeus, Wilhelm, editor; Borovskij, Jacobus, editor. Stuttgart: Teubner, 1925. Reprinted with corrections in 1976.

  1. Quidquid ponitur hinc et inde verris,
  2. Mammas suminis imbricemque porci
  3. Communemque duobus attagenam,
  4. Mullum dimidium lupumque totum
  5. Muraenaeque latus femurque pulli
  6. Stillantemque alica sua palumbum.
  7. Haec cum condita sunt madente mappa,
  8. Traduntur puero domum ferenda:
  9. Nos accumbimus otiosa turba.
  10. Ullus si pudor est, repone cenam:
  11. Cras te, Caeciliane, non vocavi.