Epigrammata

Martial

Martial. M. Valerii Martialis Epigrammata. Heraeus, Wilhelm, editor; Borovskij, Jacobus, editor. Stuttgart: Teubner, 1925. Reprinted with corrections in 1976.

  1. Hoc nemus, hi fontes, haec textilis umbra supini
  2. Palmitis, hoc riguae ductile flumen aquae,
  3. Prataque nec bifero cessura rosaria Paesto,
  4. Quodque viret Iani mense nec alget holus,
  5. Quaeque natat clusis anguilla domestica lymphis,
  6. Quaeque gerit similes candida turris aves,
  7. Munera sunt dominae: post septima lustra reverso
  8. Has Marcella domos parvaque regna dedit.
  9. Si mihi Nausicaa patrios concederet hortos,
  10. Alcinoo possem dicere 'Malo meos.'
  1. O Iuliarum dedecus Kalendarum,
  2. Vidi, Vacerra, sarcinas tuas, vidi;
  3. Quas non retentas pensione pro bima
  4. Portabat uxor rufa crinibus septem
  5. Et cum sorore cana mater ingenti.
  6. Furias putavi nocte Ditis emersas.
  7. Has tu priores frigore et fame siccus
  8. Et non recenti pallidus magis buxo
  9. Irus tuorum temporum sequebaris.
  10. Migrare clivom crederes Aricinum.