Epigrammata

Martial

Martial. M. Valerii Martialis Epigrammata. Heraeus, Wilhelm, editor; Borovskij, Jacobus, editor. Stuttgart: Teubner, 1925. Reprinted with corrections in 1976.

  1. Talis erat Marcus mediis Antonius annis
  2. Primus: in hoc iuvenem se videt ore senex.
  3. Ars utinam mores animumque effingere posset!
  4. Pulchrior in terris nulla tabella foret.
  1. Simplicior priscis, Munati Galle, Sabinis,
  2. Cecropium superas qui bonitate senem,
  3. Sic tibi consoceri claros retinere penates
  4. Perpetua natae det face casta Venus:
  5. Ut tu, si viridi tinctos aerugine versus
  6. Forte malus livor dixerit esse meos,
  7. Ut facis, a nobis abigas, nec scribere quemquam
  8. Talia contendas carmina, qui legitur.
  9. Hunc servare modum nostri novere libelli,
  10. Parcere personis, dicere de vitiis.
  1. Di tibi dent quidquid, Caesar Traiane, mereris
  2. Et rata perpetuo quae tribuere velint:
  3. Qui sua restituis spoliato iura patrono
  4. —Libertis exul non erit ille suis—,
  5. Dignus es, ut possis totum servare clientem:
  6. Ut—liceat tantum vera probare—potes.