Argonautica

Valerius Flaccus, Gaius

Valerius Flaccus. C. Valeri Flacci Setini Balbi Argonauticon Libri Octo. Kramer, Otto, editor. Leipzig: Teubner, 1913.

  1. in medios torsit; conversae protinus hastae.
  2. qualis ubi attonitos[*](attonitos Carrio, atto V, exstimulat C, cod. Bon. ) maestae Phrygas annua Matris
  3. ira vel exsectos[*](ex(s)ectos C Bon. 1, exertos V ) lacerat Bellona comatos,
  4. haud secus accensas subito Medea cohortes
  5. implicat et miseros agit in sua proelia fratres:
  6. omnis ibi[*](ibi Carrio, ubi V ) Aesoniden sterni putat, omnibus ira
  7. talis erat. stupet Aeetes ultroque furentes
  8. ipse viros revocare cupit, sed cuncta iacebant
  9. agmina, nec[*](nec Bon, 1 ne V | aut Carrio, haud V ) quisquam primus ruit aut super ullus
  10. linquitur, atque hausit subito sua funera tellus.
  11. Protinus in fluvium fumantibus evolat armis
  12. Aesonides, qualis Getico de pulvere Mavors[*](mauores V )
  13. intrat equis uritque gravem sudoribus Hebrum,
  14. aut niger ex antris rutilique a fulminis aestu
  15. cum furit et Siculo[*](Siculo Bon. 2, sicco V ) respirat in aequore Cyclops.
  16. redditus hic[*](hinc Francius ) tandem sociosque amplexus ovantes
  17. haud iam mendacem[*](iam mendacem Carr. 2 tamen dacem V ) promissa reposcere regem
  18. dignatur; nec, si ipse sibi terga ingerat ultro
  19. qui pepigit, velit in pacem dextramque reverti
  20. amplius; ambo truces, ambo abscessere minantes.