Argonautica
Valerius Flaccus, Gaius
Valerius Flaccus. C. Valeri Flacci Setini Balbi Argonauticon Libri Octo. Kramer, Otto, editor. Leipzig: Teubner, 1913.
- exciderint quae gesta manu, quae debita fatis.
- illi alacres pars arma locant, pars ardua raptis[*](raptis e. g. addidi, om. V, celsis C, summis MT, codd. Bon., Burmanni, Coki )
- insternunt tabulata toris oriturque trementum
- remorum sonus et laetae concordia vocis.
- Iuppiter urgentem ceu summa Ceraunia nubem
- cum pepulit movitque[*](mouitque M, nouitque V ) iugis, fulsere repente
- et nemora et scopuli nitidusque reducitur aether,
- sic animi rediere viris, iamque ipse magister
- nutat ab arce ratis remisque obsistere tendit.[*](tendit SM, tend V (cetera membrana teguntur))
- instaurant primi certamina liber amictu
- Eurytus et dictis Talai[*](Talai Bon. 2, eali V ) non territus Idas;
- inde alii increpitant atque aequora pectore tollunt.
- par gemitu pulsuque labor, versumque vicissim
- mittitur in puppem remo mare. laetus[*](laetus M, lactus V ) et ipse
- Alcides 'quisnam hos vocat in certamina fluctus?'
- dixit et intortis adsurgens arduus undis
- percussit subito deceptum fragmine pectus,
- atque in terga ruens Talaum fortemque Eriboten
- et longe tantae securum Amphiona molis
- obruit inque tuo posuit caput, Iphite, transtro.