Argonautica

Valerius Flaccus, Gaius

Valerius Flaccus. C. Valeri Flacci Setini Balbi Argonauticon Libri Octo. Kramer, Otto, editor. Leipzig: Teubner, 1913.

  1. Interea scelerum luctusque ignarus Iason
  2. alta secat; neque enim patrios cognoscere casus
  3. Iuno sinit, mediis ardens ne flectat ab undis
  4. ac temere in Pelian et adhuc obstantia regis
  5. fata ruat placitosque deis ne[*](ne Heinsius, neu V ) deserat actus.
  6. Iamque fretis[*](fretis C, freti V ) summas aequatum Pelion ornos
  7. templaque Tisaeae[*](Tisaeae Ald., pisaeae V ) mergunt obliqua Dianae;
  8. iam Sciathos subsedit aquis, iam longa recessit
  9. Sepias; attollit tondentes pabula Magnes
  10. campus equos: vidisse putant Dolopeia busta
  11. intrantemque Amyron[*](Amyron Maserius (Apoll. Rhod. I 596), myrin V, amyrin C ) curvas quaesita per oras
  12. aequora, flumineo cuius redeuntia vento
  13. vela legunt; remis insurgitur. inde salutant
  14. Eurymenas; recipit velumque fretumque reversus[*](reversus Bon. 1, reuerso V, reuersum C )
  15. auster, et in nubem Minyis repetentibus[*](repentibus V, corr. X 2 M 2 ) altum
  16. Ossa redit. metus ecce deum damnataque bello
  17. Pallene, circumque vident immania monstra
  18. terrigenum caelo quondam adversata gigantum,
  19. quos scopulis trabibusque parens miserata iugisque
  20. induit et versos exstruxit in aethera montes.