Hercules Furens

Seneca, Lucius Annaeus

Seneca, Lucius Annaeus, ca. 4 B.C.-65 A.D, creator; Peiper, Rudolf, 1834-1898, editor; Richter, Gustav, 1838-1904, editor

  1. utrimque montes solvit ac rupto obice
  2. latam ruenti fecit Oceano viam.
  3. post haec adortus nemoris opulenti domos
  4. aurifera vigilis spolia serpentis tulit;
  5. quid? saeva Lernae monstra, numerosum malum,
  6. non igne demum vicit et docuit mori,
  7. solitasque pinnis condere obductis diem
  8. petit ab ipsis nubibus Stymphalidas ?
  9. non vicit illum caelibis semper tori
  10. regina gentis vidua Thermodontiae,
  11. nec ad omne clarum facinus audaces manus
  12. stabuli fugavit turpis Augei labor.
  13. Quid ista prosunt? orbe defenso caret,
  14. sensere terrae pacis auctorem suae
  15. abesse tristes: prosperum ac felix scelus
  16. virtus vocatur; sontibus parent boni.
  17. ius est in armis, opprimit leges timor,
  18. ante ora vidi nostra truculenta manu
  19. gnatos paterni cadere regni vindices
  20. ipsumque, Cadini nobilis stirpem ultimam,