Fabulae

Phaedrus

Phaedrus. Phaedri Augusti Liberti Fabulae Aesopiae. Müller, Lucian, editor. Leipzig. Teubner, 1876.

  1. Magno apparatu laeta resonabat domus,
  2. Repente duo cum iuvenes sparsi pulvere,
  3. Sudore multo diffluentes corpora,
  4. Humanam supra formam, cuidam servulo
  5. Mandant ut ad se provocet Simonidem;
  6. Illius interesse, ne faciat moram.
  7. Homo perturbatus excitat Simonidem.
  8. Unum promorat vix pedem triclinio,
  9. Ruina camerae subito oppressit ceteros;
  10. Nec ulli iuvenes sunt reperti ad ianuam.
  11. Ut est vulgatus ordo narratae rei,
  12. Omnes scierunt numinum praesentiam
  13. Vati dedisse vitam mercedis loco.