Fabulae

Phaedrus

Phaedrus. Phaedri Augusti Liberti Fabulae Aesopiae. Müller, Lucian, editor. Leipzig. Teubner, 1876.

  1. Quantum valerent inter homines litterae,
  2. Dixi superius: quantus nunc illis honos
  3. A superis sit tributus tradam memoriae.
  4. Simonides idem ille de quo rettuli,
  5. Victori laudem cuidam pyctae ut scriberet
  6. Certo conduxit pretio, secretum petit.
  7. Exigua cum frenaret materia impetum,
  8. Usus poeta moris est licentia
  9. Atque interposuit gemina Ledae sidera,
  10. Auctoritatem similis referens gloriae.
  11. Opus approbavit; sed mercedis tertiam
  12. Accepit partem. Cum reliquum posceret:
  13. Illi inquit reddent quorum sunt laudis duae.
  14. Verum ut ne irate te dimissum sentiant,
  15. Ad cenam mihi promitte; cognatos volo
  16. Hodie invitare, quorum es in numero mihi.
  17. Fraudatus quamvis et dolens iniuria,
  18. Ne male dimissam gratiam corrumperet,
  19. Promisit. Rediit hora dicta, recubuit.
  20. Splendebat hilare poculis convivium,