Fabulae

Phaedrus

Phaedrus. Phaedri Augusti Liberti Fabulae Aesopiae. Müller, Lucian, editor. Leipzig. Teubner, 1876.

  1. Cum de fortunis quidam quereretur suis,
  2. Aesopus finxit consolandi gratia:
  3. Vexata saevis navis tempestatibus,
  4. Inter vectorum lacrimas et mortis metum
  5. Faciem ad serenam subito ut mutatur dies,
  6. Ferri secundis tuta coepit flatibus
  7. Nimiaque nautas hilaritate extollere.
  8. Factus periclis tum gubernator sophus:
  9. Parce gaudere oportet et sensim queri,
  10. Totam aeque vitam miscet dolor et gaudium.