Fabulae

Phaedrus

Phaedrus. Phaedri Augusti Liberti Fabulae Aesopiae. Müller, Lucian, editor. Leipzig. Teubner, 1876.

  1. Et masculina membra applicuit feminis.
  2. Ita nunc libido pravo fruitur gaudio.
  1. Barbam capellae cum impetrassent ab Iove,
  2. Hirci maerentes indignari coeperunt
  3. Quod dignitatem feminae aequassent suam.
  4. Sinite inquit illas gloria vana frui
  5. Et usurpare vestri ornatum muneris,
  6. Pares dum non sint vestrae fortitudinis.
  7. Hoc argumentum monet ut sustineas tibi
  8. Habitu esse similes qui sint virtute impares.
  1. Cum de fortunis quidam quereretur suis,
  2. Aesopus finxit consolandi gratia:
  3. Vexata saevis navis tempestatibus,
  4. Inter vectorum lacrimas et mortis metum
  5. Faciem ad serenam subito ut mutatur dies,
  6. Ferri secundis tuta coepit flatibus
  7. Nimiaque nautas hilaritate extollere.
  8. Factus periclis tum gubernator sophus:
  9. Parce gaudere oportet et sensim queri,
  10. Totam aeque vitam miscet dolor et gaudium.