Fabulae

Phaedrus

Phaedrus. Phaedri Augusti Liberti Fabulae Aesopiae. Müller, Lucian, editor. Leipzig. Teubner, 1876.

  1. Lucernam fur accendit ex ara Iovis
  2. Ipsumque compilavit ad lumen suum.
  3. Onustus qui sacrilegio cum discederet,
  4. Repente vocem sancta misit Religio:
  5. Malorum quamvis ista fuerint munera
  6. Mihique invisa, ut non offendar surripi,
  7. Tamen, sceleste, spiritu culpam lues,
  8. Olim cum ascriptus venerit poenae dies.
  9. Sed ne ignis noster facinori praeluceat,
  10. Per quem verendos excolit pietas deos,
  11. Veto esse tale luminis commercium.
  12. Itaque hodie nec lucernam de flamma deum
  13. Nec de lucerna fas est accendi sacrum.
  14. Quot res contineat hoc argumentum utiles,
  15. Non explicabit alius quam qui repperit.
  16. Significat primo saepe quos ipse alueris,
  17. Tibi inveniri maxime contrarios;
  18. Secundum ostendit scelera non ira deum,
  19. Fatorum dicto sed puniri tempore;
  20. Novissime interdicit ne cum malefico