Fabulae

Phaedrus

Phaedrus. Phaedri Augusti Liberti Fabulae Aesopiae. Müller, Lucian, editor. Leipzig. Teubner, 1876.

  1. Qui pretium meriti ab improbis desiderat,
  2. Bis peccat: primum quoniam indignos adiuvat;
  3. Impune abire deinde quia iam non potest.
  4. Os devoratum fauce cum haereret lupi,
  5. Magno dolore victus coepit singulos
  6. Illicere pretio, ut illud extraherent malum.
  7. Tandem persuasa est iure iurando gruis,
  8. Gulaeque credens colli longitudinem,
  9. Periculosam fecit medicinam lupo.
  10. Pro quo cum pactum flagitaret praemium:
  11. Ingrata es inquit ore quae nostro caput
  12. Incolume abstuleris et mercedem postules.