Saturae
Persius
Persius. Juvenal and Persius. Ramsay, G. G., editor. London, New York: William Heinemann, G. P. Putnam's Sons, 1918.
- hoc igitur, quo tu Iovis aurem impellere temptas,
- dic agedum Staio: pro Iuppiter! o bone, clamet,
- Iuppiter! at sese non clamet Iuppiter ipse?
- ignovisse putas, quia, cum tonat, ocius ilex
- sulpure discutitur sacro quam tuque domusque?
- an quia non fibris ovium Ergennaque iubente
- triste iaces lucis evitandumque bidental,
- idcirco stolidam praebet tibi vellere barbam
- Iuppiter? aut quidnam est qua tu mercede deorum
- emeris auriculas? pulmone et lactibus unctis?
- Ecce avia aut metuens divum matertera cunis
- exemit puerum, frontemque atque uda labella
- infami digito et lustralibus ante salivis
- expiat, urentis oculos inhibere petita;
- tunc manibus quatit et spem macram supplice voto
- nunc Licini in campos, nunc Crassi mittit in aedis:
- hunc optent generum rex et regina; puellae
- hunc rapiant; quidquid calcaverit hic, rosa fiat.
- ast ego nutrici non mando vota; negato,
- Iuppiter, haec illi, quamvis te albata rogarit![*]()
p.338