Tristia

Ovid

Ovid: Tristia. Ponto. Wheeler, Arthur Leslie, editor. Cambridge, MA; London, UK: Harvard University Press; William Heinemann Ltd., 1939 (printing).

  1. ne noceam grato vereor tibi carmine, neve
  2. intempestivus nominis obstet honor,
  3. quod licet (et [*](hoc) tutum est) intra tua pectora gaude
  4. meque tui memorem teque fuisse pium,
  5. utque facis, remis ad opem luctare ferendam,
  6. dum veniat placido mollior aura deo;
  7. et tutare caput nulli servabile, si non
  8. qui mersit Stygia sublevet illud aqua;
  9. teque, quod est rarum, praesta constanter ad omne
  10. indeclinatae munus amicitiae.
  11. sic tua processus habeat fortuna perennes,
  12. sic ope non egeas ipse iuvesque tuos,
  13. sic aequet tua nupta virum bonitate perenni,
  14. incidat et vestro nulla [*](nulla rara) querella toro;
  15. diligat et semper socius de sanguinis illo,
  16. quo pius affectu Castora frater amat;
  17. sic iuvenis similisque tibi sit natus, et illum
  18. moribus agnoscat quilibet esse tuum;
  19. sic faciat socerum taeda te nata iugali,
  20. nec tardum iuveni det tibi nomen avi.