Metamorphoses

Ovid

Ovid. Die Metamorphosen des P. Ovidius Naso, Volume 1-3. Magnus, Hugo, editor. Gotha, Germany: F.A. Perthes. 1892-1919.

  1. nubilaque induco, ventos abigoque vocoque,
  2. vipereas rumpo verbis et carmine fauces,
  3. vivaque saxa sua convulsaque robora terra
  4. et silvas moveo, iubeoque tremescere montes
  5. et mugire solum manesque exire sepulcris.
  6. Te quoque, Luna, traho, quamvis Temesaea labores
  7. aera tuos minuant; currus quoque carmine nostro
  8. pallet avi, pallet nostris Aurora venenis.
  9. Vos mihi taurorum flammas hebetastis et unco
  10. impatiens oneris collum pressistis aratro,
  11. vos serpentigenis in se fera bella dedistis
  12. custodemque rudem somno sopistis et aurum
  13. vindice decepto Graias misistis in urbes.
  14. Nunc opus est sucis, per quos renovata senectus
  15. in florem redeat primosque reconligat annos.
  16. Et dabitis. Neque enim micuerunt sidera frustra,
  17. nec frustra volucrum tractus cervice draconum
  18. currus adest.” Aderat demissus ab aethere currus.
  19. Quo simul adscendit frenataque colla draconum
  20. permulsit manibusque leves agitavit habenas,